Acɛkpikpa ɔ kpo hunjɛ ɖ’azɔwatɔ ji gbɛta lɛ kpo kple. Azɔfɔkɔnnyanyi xo ɖ’azɔmɛ xwe mitɔn lɛ hɛn hun n’acɛkpikpa ɔ. Daxwi nɛ ɔ mɛ wɛ e lɛ vɔ kple ɖevo blo xa kplekple ye mɛ e nɔ jɛ hun ɖ’azɔwatɔ lɛ ji e tɔn kpo. Azangagbe azan fɔtɔn e hwe ɖokpogɔɔ sun e mɛ mi ɖe ɔ tɔn wɛ ye blo kple nɛ ɔ ɖo Kutɔnu. Alɔ na do wema n’azɔfɔkɔnnyanyi na sixu nɔ te wu wɛ ye kple lo ɔ, nu sɔ nyi mɔ a ɖo ye se nu jɛ yeɖe gbe mɛ ganxixo ɛnɛ gudo a. Đo ganxixo nɛ ɔ gblamɛ ɔ, ye yi gbɔjɛ cɛju yɔyɔɛ ɖe bonu akpaxwe ɖokpo ɖokpo na sixu ɖɔ xo ɖo e ɖe tɛntin ba sɔ gbeta ɖokpo. E na ɖɔ ɔ , akwɛ ee acɛkpikpa ɔ ɖe sin mɛsi lɛ sin suzan fo kwɛ mɛ e wɛ nyi adɔn ee kpo ɖo ee kpo hunjɛ ɖ’azɔwatɔ ji gbɛta lɛ kpo e. Nu mɛɖaxo Moudachirou Bachabi, Confédération générale des travailleurs du Bénin (Cgtb) gan ɔ, jiɖiɖe ee ɖo na tiin ɖo ye kpod’acɛkpikpa ɔ kpo tɛntin ɔ kun sɛ yi ba e mɛ e ɖo na nɔ e o. Nu Cgtb gan ɔ, e ci ɖ’acɛkpikpa ɔ jlo na sɔ akwɛ ɖe sin akwɛ mɛ xo ɔ ɖo nukɔn ba mɔ tɛn gba hun do nu ye nu azɔfɔkɔnnyanyi xo ɔ na yi xɔ. Mɛɖaxo ɔ kpa glagla n’acɛkpikpa ɔ lobo ka tinmɛ ɖɔ n’ɖe n’ɖe xo ee ye ɖɔ e ɖelɛ kun ɖo wema ee mɛ na d’alɔ wɛ ye ɖe e o, hun ye na lɛ gbɛ kan ɖ’azɔfɔkɔnnyanyi ɔ nu. Ganhɔnyitɔ e kpacɛ ɖo to nukɔn yiyi xo wu e, Abdoulaye Bio Tchané, ɖo nyɔnuzangbe sɔ e wa e, ɖo tintinmɛ wɛ ɖɔ ye ɖo nukun ɖiɖo mɛ nu hunjɛ ɖ’azɔwatɔ ji gbɛta gan lɛ na sɔ gbeta nu sɛwa ma ɖɔ na lɛ bɛ. Acɛkpikpa ɔ gbɔn ganhɔnyitɔ ji bo ɖo ye mɛ ee f’azɔkɔnyanyi lɛ byɔ wɛ ɖɔ ye ni v’azɔ bɛ nu nukɔn yiyi to ɔ tɔn. Mɔ ɖokpo ɔ e ɖo gbe hwan nyi sɛ d’azɔmɛ vi dokɔ tɔn, linsinmɛ tɔn kpodo kplɔnyijin’alavɔ tɔn lɛ kpan ɖɔ ye bi ni lɛ vɔ afɔ xuxu do wema xɔmɛ loo ka ɖo vitɔ vinɔ lɛ da wɛ ɖɔ ye ni nɔ ye gudo ɖ’ali nɛ xo. Mi na flin mi ɖɔ Confédération syndicale des travailleurs du Bénin(Cstb) gbɛta ɔ kun nɔ kple ɔ domɛ o ɖo gan e kpacɛ ɖe nu e nɔ klpe ee ye blo ɖo togan ɔ gbasa taatagbe ee mi do gudo e a. Kple atɔngɔɔ blo wɛ e ɖe ɖ’azɔfɔkɔnnyanyi xo ɔ wu nɛ. PS et DA (ISSIC-BÉNIN). Vendredi 16 mars 2018 Le Matinal/Fongbé.