Depiteyo ba gannadiya nna kpeikpaasi fɔyo Immunité ka. Gannadiya hinza (Valentin Djenontin, Idrisu Bako nna Atao Hinnuho) nna kpeikpaasi zenɔ hinza (Fatumatu Amadu Djibril, Komi Koutché nna Abubakar Yaya) sɛ nɔ n ba goosu nɛ ka kpee cɛnɛ. N ma duwa ka goosu nn sɛ ganna nɔ Kutɔnu goosi fu beeri na tilayo samma depiteyo sɛ, nn ma duwa ka jirima (ka n’cɛ Immunité) ka Benɛɛ wooda nya beeri na kpeikpaasi nna ganna diyayo nɔ kaa jina. Tilayo di kuna n cibayo ka senniyo gono ka goosikpɛyo baa ka bɔrɔ iduyo han. Domi, saayo ka kpeikpaasi hinzayo di dom cini ko gbeitɛ, dibi dibi fɔyo dom tɛ. Tilayo di cibayo ka saa ka Fatumatu Amadu Djibril, Valentin Djenontin nna Idrisu Bako dom gbei tɛ nna gannakpɛ Yayi Boni dibi dibi fɔyo dom tɛ, za jiiri 2013 ka kpee 2016, haabu nɔru looyo dɔ kammɛ. Tilayo di cibayo ka saa ka Abubakar Yaya dom bara kpeikpaasi kaa kulayo nna gbei senni, a na garaza fɔyo siriyani ka gonna dibi dibi, ka a su yoyo. Hinni mɛ safari nɛrayo senni ganna nɔ, n depite Atao Hinnuho ceeji. Saa ka Komi Koutché dom bara kpeikpaasi, bɔrɔ fɔ dom huro a fu kuna ka miliɔ zɔ iyye zei. Saa di, a dom kpee nna senni di baa poliisi kpaara, amma, boroo na ka bei mɛtɛ ka senni di beeni. Benɛɛ ganna wooda nya beeri ŋmɛnɛ asariya weigantɛ nna zɔn fɔ nna waranza cini iduntɛ ya ci ka a ba hini ka tɛ n ma kpeikpaasi ɔu ganna diyayo goosu de nn na daa mɛɛrɔyo tɛ. Asariya weigantɛ di ci ka n ma duwa ka goosu kpeikpaasi nna depite sɛ a hima depite weigu cini gu ma tutu depite waaku cini hinza kuna. AAAT (ISSIC-BÉNIN). Vendredi 22 février 2018 Le Matinal/Dendi