Gominanti gbeiteriyo bukaatayo na biya jina. Gannakpɛ Patrice Talon kube nna gbeiteriyo fansayo igbɛyo harukusuyo, atalata zenɔ, Kutɔnu. Hanu di, senni iyye ka nn bara saabu gbeiteriyo binɛɛ sarayo nna gominanti kulu ŋmɛnɛ faaji nɔ tɛ. Gbeiteriyo cibayo ka nasara gbeiteriyo handu buyo nɔ cɛnɛ kulu kulu nɔ fɔtɔ weitaaci. Nn cibayo ka nɔru di mutu ko cɛnɛ. A ganna, nn na gominanti ŋmaarɛ n nɔru di tɔntɔnu am duwa ka tɔ fɔtɔ waaku. Amma, gannakpɛ ci ka a su hini ka tɛ am bukaata di biya, domi nuka iri gono gominanti sina gaabi am duka alkawali di za mansa. Sukuuru alfayo bukaatayo dɔ kammɛ, Patrice Talon ci a ba igbɛ fɔ disi ka a ba lasbu ka ci gominanti sɛ hɛ ka a hima gominanti ma tɛ, sukuuru alfayo di binɛ yei. Nn yara ka nn lakariyo yeti Patrice Trekpo nna Laurent Mètognon dɔ kammɛ. Gannakpɛ ci ka Patrice Trékpo bara nɔ sɔja, deya, a na hima am taarɛ ka a tɛ di dimi tɛ. A ganna, a su hini ka tɛ n ma a gafara tɛ a sɛ cifɔ cifɔ ya. Amma, a ci gbeiteriyo ma nn lakari karanni ka a ba lasabu ka diya de a ba yeti a gbei kuna. Patrice Talon ci ka Laurent Mètognon senni di nna bara gominanti senni kpɛnɛ, domi a gono goosikpɛ kammɛ kuna kɔ. Deya, se nn ma goosikpɛ nam nn ma gbei tɛ ka beeni. Kɔkɔrɔ banna, gannakpɛ ci gbeiteriyo sɛ ka nn ba kubeyo di kɔkɔi nna a kpeikpaasiyo hanu taagɔ. Iri noo hɔŋani ka wooda ka depiteyo zaa ko hoŋu lokotoro gbeiteriyo, goosikpɛyo nna baa poliisi sɛ gbei namyo saabu ganna nɔ Benɛɛ ganna gbeiteri tutuma su kpee gbei. Maruis CHALLA et Nimatou SABI (ISSIC-BÉNIN). Vendredi 09 février 2018 Le Matinal/Dendi.